|
|
GO TO MLC HOMEPAGE
ONLINE BOOKSTORE FEATURED TITLES
Songs of Earth and Light
Richesses: Francophone Songwriter Poets
Munster Literature Centre
|
|
Lámha an dealbhóra
Tháinig cruth orm faoi do lámha dhear tú mé le do shiséal bhain tú píosaí díom
Chuir tú faobhar orm bean chloiche anois mé snoite as marmar – dealbh
Shéan tú an bhoige ba thú an saor cloiche
Idir do mhéara d’éirigh iomairí agus cuasacha machairí sliabhraon mo cholainne
Bhris tú an gheis ag tabhairt saoirse don chruth a bhí faoi shuan sa chloch
Cheartaigh tú mé d’éirigh mé níos áille ach bhí sé pianmhar chaill mé píosaí díom féin thit bloghra agus bloghanna uaim ina smionagar faoi do lámha dealbhóra
ach tá do lámha briste anois criogánach, altach, cranraithe mar a bheadh craobhacha ag dul in aois
fulaingíonn an dealbhóir trína lámha níl teanga acu anois ach an tost tá briseadh iontu nach féidir a leigheas creimeadh na mblianta istigh go smior sa chnámh, is fuaire céasadh na ngéag is é cromtha, dearadh ná snoí ní dhéanfaidh sé a thuilleadh ach a ghéaga crainn gan lúbadh ná bogadh iontu seargtha, stompaithe stalctha is righin; na lámha. Is níl fanta díom ach sceamhóga is scealpóga smiota. Lán doirn, lán boise, lán glaice de neamhní.
©2012 Caitríona Ní Chléirchín
Author Links
Caitríona Ní Chléirchín ag léamh ag O'Bheal (MP3, 5.2 MB) Cumann Scríbhneoirí Úra na Gaeilge--(Agallamh na Míosa: Caitríona Ní Chléirchín)Ceannaigh Crithloinnir le Caitríona Ní Chléirchín ag Coiscéim.ie
|
|||||||
©2009 Southword Editions and Munster Literature Centre |
|
||||||||||
Bhuaigh Caitríona Ní Chléirchín an chéad duais i gcomórtas na Scríbhneoirí Úra san Oireachtas i mbliana, as a chéad chnuasach Crithloinnir a foilsíodh i mí Iúil. Scríobhann sí léirmheasanna, ailt iriseoireachta agus acadúla chomh maith agus tá dánta foilsithe aici in Comhar, Feasta agus Blaiseadh Pinn, Cyphers agus An Guth. Léachtóir le Gaeilge í i gColáiste na hOllscoile Bhaile Átha Cliath agus tá dochtúireacht ar bun aici ar fhilíocht Nuala Ní Dhomhnaill agus Biddy Jenkinson. Chaith sí bliain i Lyon na Fraince, ag déanamh máistreachta ar an litríocht Fhrancach. Is as Scairbh na gCaorach i gCo. Mhuineacháin ó dhúchas í.
