|
|
GO TO MLC HOMEPAGE
ONLINE BOOKSTORE FEATURED TITLES
Songs of Earth and Light
Richesses: Francophone Songwriter Poets
Munster Literature Centre
|
|
De bhunadh Árainn Mhór i dTír Chonaill é Proinsias Mac a’ Bhaird. Tá cónaí air faoi láthair idir an t-oileán agus Leitir Ceanainn, áit a oibríonn sé mar mhúinteoir. Tá ocht leabhar Gaeilge dá chuid i gcló. Úrscéal darbh ainm “Rún an Bhonnáin” agus cnuasach filíochta “Faigh greim ar an ghrian” an dá leabhar is déanaí uaidh. Bhain sé amach an gearrliosta i gcomórtas filíochta Bhéal Átha na mBuilí sa bhliain 2008 agus bhain sé an chéad áit i gcomórtas filíochta Uí Néill sa bhliain 2010. Bronnadh an chéad duais d’úrscéal ar a shaothar ‘Rún an Bhonnáin’ ag Comórtas Liteartha Oireachtas 2011.
Míol mór Bhreandáin
Soitheach bheag más cruinn mo chuimhne tarraingthe fríd an ghlaise ag géaga gaoithe ag scoilteadh tonn, ag briseadh bán idir tír is Inis Bó Finne.
Silín uisce sna cláraí a tharraing mo shúil ó chlaise mara is ó chlupaideach seoil, domhsa i mo sheacht mbliana ba rabharta ár mbáite é is chrom mé ar thaomadh scáfar.
“Níl spút ag an ghasúr sin,” a dúirt fear an scóid ach tharraing m’athair maidí rámha tharam is coinnigh ina ucht mé go dtáinig muid i dtír, droim gharbh an chladaigh ina thearmann domh.
Ag cuimhniú domh siar anois ar an doirling úd gach cloch mar bhairneach ar mhuin míl mhóir tuigim faoiseamh an mhanaigh a chroch éadach le gaoth is a fuair talamh tirim faoi chos ar mhuir.
Ó shin is mé ag tabhairt aghaidhe ar na toinn tarraingím aibíd mo bhráthair gaoil tharam mar ghéaga an athar atá paidir an naoimh a choinneos feasta is choíche ar an fharraige mé.
©2012 Proinsias Mac a' Bhaird
Author Links
Blog le Proinsias Mac a' Bhaird Agallamh le Mac a' Bhaird ag Gaelchultúr
|
|||||||
©2009 Southword Editions and Munster Literature Centre |
|
||||||||||
